شو اسمها؟؟؟؟؟؟؟؟ آه

يعني بتسأل الواحد فيهم، بتعرف فرقة العاشقين؟ بيقللك آه هاي الفرقة القديمة اللي بتغني أغاني عشق وحب!!!!!

طيب بتعرف أحمد قعبور؟ بيصير الواحد فيهم يضحك وكأنه الاسم فيه شي، وبيكون هو اسمه لؤي متعب طرقوع خربوش!!!!

طيب يا عمي بلاش، سمعت بسميح شقير؟ بيقلك آهااا هذا بعرفه، مش هذا اللي كان يعزف عود ورا إم كلثوم؟ وطبعاً تعلو وجهه نظرة ذكاء لا يمكن وصفها إلا بقمة الغباء.

بتمسك حالك شوي، وبتقله طيب سيبك من هذول كلهم، ميس شلش؛ عمرك سمعت فيها؟ بيقلك طبعاً، ها كيف لعاد،،، هاي اللي بتغني أغاني أم كلثوم كلهن.

بتعطيه آخر فرصة بسؤال سهل، طيب احكيلي اغنيتين لمارسيل خليفة؟ بيقلك يا بحرية واحن إلى خبز أمي،،، طبعاً حتى اليهود بيعرفوا هالأغنيتين قد ما هن مشهورات،، معلش خطي، بنمشيله إياها.

بعد بارقة الأمل بمعرفة اغنيتين لمارسيل بتسأله، طيب أعطيني أغنيتين لجوليا بطرس؟ بيقلك اييه، هاي سهلة: يا قصص وشي غريب.

بتصفن فيه شوي وبعدين بتلاقي إنك بتستاهل مليون كف على خد واحد لإنك سألت هيك أشكال،،،،، بعد بشوي بتستذكر وبتلاقي إنه يمكن 90 بالمية من شباب هالأيام هيك وأعطل من هيك،،،، بتشغل أغنية يما مويل الهوا وبتعيّط للصبح، مش عالغنية، ولا عاللي غناها، ولا على حالك، ولا على الشباب،،،،، بتعيّط على البلاد اللي بتستنانا!